વાપી: વાપીના રાજસ્થાન ભવન ખાતે, રાજસ્થાન પ્રગતિ મંડળ ચેરીટેબલ ટ્રસ્ટના સહયોગથી, પૂર્વ નગરસેવિકા અને પ્રખર સમાજસેવિકા સ્વર્ગીય મંજુ દાયમાની 18મી પુણ્યતિથિ નિમિત્તે એક વિશાળ રક્તદાન શિબિરનું આયોજન કરવામાં આવ્યું હતું. દાયમા પરિવાર અને રાજસ્થાન પ્રગતિ મંડળ દ્વારા છેલ્લા 18 વર્ષથી યોજાતા આ ભગીરથ કાર્યમાં મોટી સંખ્યામાં રક્તદાતાઓએ ઉત્સાહભેર ભાગ લીધો હતો. આ વર્ષે કુલ 441 યુનિટ રક્ત એકત્ર કરવામાં આવ્યું હતું.
સ્વ. મંજુ દાયમાના સેવાકીય કાર્યોને યાદ કરતાં દાયમા પરિવારે જણાવ્યું કે, તેઓ સમાજ સેવા માટે હંમેશા તત્પર રહેતા હતા. ભુજના ભૂકંપ અને કારગિલ યુદ્ધ જેવી કટોકટીની પરિસ્થિતિઓમાં લોહીની તાતી જરૂરિયાત ઊભી થતાં તેમણે રક્તદાન પ્રત્યે લોકોમાં જાગૃતિ લાવવાનું બીડું ઝડપ્યું હતું. તેમના નિધન બાદ, આ સેવાકાર્યને આગળ ધપાવતાં દાયમા પરિવારે દર વર્ષે તેમની પુણ્યતિથિ નિમિત્તે રક્તદાન શિબિરનું આયોજન કરવાનું શરૂ કર્યું. ગત વર્ષે (17મી પુણ્યતિથિએ) આ શિબિરમાં 501 યુનિટ રક્ત એકત્ર કરવામાં આવ્યું હતું, જે આ વર્ષે પણ સફળતાપૂર્વક આગળ ધપ્યું છે.
રાજસ્થાન પ્રગતિ મંડળના પ્રમુખ રાજેશ દુગ્ગડે આ પ્રસંગે જણાવ્યું કે, “આ રક્તદાન કેમ્પ માત્ર એક આયોજન નથી, પરંતુ એક ઉત્સવ છે.” તેમણે મંજુ દાયમાને શ્રદ્ધાંજલિ અર્પતાં કહ્યું કે આ રક્તદાન દ્વારા એકત્ર થયેલું રક્ત અનેક જરૂરિયાતમંદ દર્દીઓનું જીવન બચાવવામાં મદદરૂપ થશે.
તેમણે તમામ રક્તદાતાઓ અને આયોજનને સફળ બનાવવા માટે જહેમત ઉઠાવનાર કાર્યકર્તાઓ, જેમાં હનુમાનજી શર્માનો સમાવેશ થાય છે, તેમનો આભાર વ્યક્ત કર્યો હતો.
આ કાર્યક્રમમાં વાપીના રાજકીય આગેવાનો, ઉદ્યોગકારો અને વિવિધ સામાજિક સંસ્થાઓના પ્રતિનિધિઓ પણ મોટી સંખ્યામાં ઉપસ્થિત રહ્યા હતા.
આ તમામ મહાનુભાવોએ રક્તદાનના મહાદાનના મહત્વ પર ભાર મૂકી, આવા સમાજલક્ષી કાર્યક્રમોને સતત પ્રોત્સાહન આપવા બદલ દાયમા પરિવાર અને રાજસ્થાન પ્રગતિ મંડળની સરાહના કરી હતી. આ શિબિરમાં વાપી, દમણ, પારડી, વલસાડ અને સેલવાસના રક્તદાતાઓએ ઉત્સાહભેર ભાગ લીધો હતો. આ પ્રસંગે રક્તદાતાઓનું સન્માન પણ કરવામાં આવ્યું હતું, જેથી અન્ય લોકો પણ આ પુણ્યના કાર્ય માટે પ્રેરાય.
