વલસાડ જિલ્લા માર્ગ સલામતી સમિતિની બેઠક ઈન્ચાર્જ જિલ્લા કલેકટરશ્રી અતિરાગ ચપલોતના અધ્યક્ષસ્થાને કલેકટર કચેરીના સભાખંડમાં મળી હતી.
વલસાડ જિલ્લામાં હાઈવે અને સ્ટેટ હાઈવે પર થતા અકસ્માતોને રોકવા માટે જિલ્લા પોલીસ અધિક્ષક ડો.કરણરાજ વાઘેલા દ્વારા જૂના બ્લેક સ્પોટ અને નવા ઉમેરાયેલા બ્લેક સ્પોટ અંગે પીપીટી દ્વારા પ્રેઝન્ટેશન કરી આ બ્લક સ્પોટ ઉપર થતા અકસ્માતો અટકાવવા માટે શું કરી શકાય તે અંગે નેશનલ હાઈવે ઓથોરિટી ઓફ ઈન્ડિયા, સ્ટેટ અને જિલ્લા પંચાયતના માર્ગ અને મકાન વિભાગને જ્યાં જ્યાં બ્લેક સ્પોટ છે ત્યારે વાહન ચાલકો અને રાહદારીઓની સુરક્ષા માટે સર્વિસ રોડ, રેલીંગ, સોલાર બ્લિનકર્સ, સાઈન બોર્ડ, સ્પીડ લિમિટ બોર્ડ, રબર સ્ટ્રીપ બમ્પ બનાવવા સહિતના અનેક સૂચનો કર્યા હતા.
આ સિવાય શહેર અને જિલ્લામાં આવેલા વિવિધ ધોરીમાર્ગો, ડુંગરાળ વિસ્તારોમાં માર્ગ સલામતી પુલોની સલામતી જાળવવા જરૂરી ચકાસણી અને સુધારણા બાબતે સમીક્ષા કરવામાં આવી હતી. નવા બની રહેલા માર્ગો પર વર્ક ઝોન ટ્રાફિક મેનેજમેન્ટ પ્લાન, ટ્રાફિક નિયમોના અમલીકરણ, વાહનોમાં શાળાના બાળકો અને મુસાફરોનું ક્ષમતા કરતા વધુ વહન, માલ વાહક ભારે વાહનોમાં મુસાફરો દ્વારા ગેરકાયદેસર મુસાફરી ઉપર નિયંત્રણ સંદર્ભે કરેલી કામગીરીની સમીક્ષા કરવામાં આવી હતી. આ બેઠકમાં વલસાડ પ્રાંત અધિકારી વિમલ પટેલ સહિત સંબંધિત વિભાગના અધિકારીઓ ઉપસ્થિત રહ્યા હતા.
